Háliidatgo oahppat sámemusihka dahje ráhkadit iežat musihka ja musihkkavideo? Ohcat iežat soga láhppon musihkkaárbevieru, oahpat čuojahit ja lávlut? Sáhtášiigo musihkka buktit dutnje dietnasa?
Sámi musihkkaakademiijas álgá jahkásaš skuvlenprográmma mii fállá oahpahusa dain dieđuin ja dáidduin maid sámemusihka suorgi gáibida.
Sámi musihkkaakademiijas álgá jahkásaš skuvlenprográmma mii fállá oahpahusa dain dieđuin ja dáidduin maid sámemusihka suorgi gáibida. Oahpahusas deattuhuvvo sámemusihkka ja dan dehálaš doarjjan leat ee. musihkkateknologiija, máilmmi musihkkakultuvrraide oahpásmuvvan, musihkkateoriija, instrumeantaoahput ja ovttasčuojaheapmi sihke musihkkapedagogihka ja kulturfitnodoaibma. Prográmma addá buorre vuođu ohcat musihkkasuorggi joatkkaoahpuide.
Ohcanáigi : 10.4.-20.6.2018, Oahpahusbáiki: Ohcejohka
Oahpahusgiella: Sámegiella, veahkkegiellan suomagiella ja eaŋgasgiella
Oahput sisttisdollet ee. musihkkavideo ráhkadeami, iežas musihka komponerema ja heiveheami ja ovttasčuojaheami. Skuvla johtá Sámis ja mii fitnat ee. oahpásmuvvamin Guovdageainnu beassášfestiválii ja doallat konsearttaid máŋggain báikkiin. Bargat sihke joavkkus ja iehčanasat. Min oahpaheaddjit leat musihka sierra surggiid ámmátolbmot.
Sii geat čađahit vuosttas jagi oahpuid, sáhttet ohcat nuppi jagi prográmmii, mii álgá borgemánus 2019. Sámi musihkkaakademiija nuppi jagi oahput čiekŋudit vuosttas jagi oahpuid ja addet válmmašvuođa searvat musihkkasuorggi vuođđodutkosa čájáhusdutkosii/eksámenii dahje dan osiide. Čájáhusdutkkus/eksámen lágiduvvo geassit 2020.