Oahpposoahpamuš

Oahpposoahpamuš lea mearreáigásaš bargogaskavuhtii vuođđuduvvan ámmátlaš skuvlejupmi, mas bargoaddi skuvle juogo ođđa dahje jo barggus lean bargi. Oahpposoahpamušskuvlejumis stuđentii máksojuvvo bálká ja son lea bargoservoša ovttaveardásaš lahttu. Stuđeantta vahku bargoáigi galgá leat gaskaearálaččat unnimustá 25 diimmu ja stuđeanta galgá leat deavdán 15 jagi.

Oahpposoahpamuš heive bures bargokarrieara eará muttuide. Vaikko livččet bargoeallima vásihan bargi dahje easkkaálgi, oahpposoahpamušas barggu ja stuđerema ovttasteapmi lihkostuvvá njuovžilit. Bargosajis dáhpáhuvvan čehppodaga skáhppoma sáhttá dievasmahttit ovdamearkan oahppolágádusas ja neahttaoahppanbirrasis. Oahpposoahpamuša guhkkodat molsašuddá skuvlejumi mihttomeriid ja oahppi árabut skáhppon čehppodaga mielde.

Oahpposoahpamušain sáhttá čađahit olles dutkosa, ovttaskas dutkosa oasi dahje dutkosiid osiid ja oahpposoahpamušain sáhttá stuđeret seammá ámmátlaš vuođđodutkosiid, ámmátdutkosiid ja spesiálaámmátdutkosiid go oahppolágádusskuvlejumis. Lassin oahpposoahpamušskuvlejupmi fállá viiddis vejolašvuođaid ámmátlaš lasseskuvlejupmái sihke čehppodaga beaivádeapmái ja nanosmahttimii.  

Bargosadji nammada stuđentii bardosadjebagadalli, guhte atná fuola stuđeantta oahpaheamis ja láidesteamis bargosajis. Bargosadjebagadalli doaibmá maiddái oktavuođaolmmožin bargosaji, stuđeantta ja oahppolágádusa gaskkas. Stuđeantta bagadandoaimma sáhttá maiddái juohkit máŋgga olbmui bargosajis.

Maiddái fitnodatdoalli sáhttá skuvlet iežas oahpposoahpamušain. Prinsihpat leat eanas seammát go oahpposoahpamušskuvlejumis dábálaččat. Fitnodatdoalli maiddái dárbbaša bargosadjebagadalli dahjege mentora. Mentor sáhttá leat iežas fitnodagas, muhtun nuppi fitnodagas dahje muđuid čehppodagas, skuvlejumis dahje bargovásáhusas beales bagadallin heivvolaš olmmoš.

Oahpposoahpamuš lea buorre vejolašvuohta 

• stuđeret njuovžilit ámmáha
• skáhppot lasseskuvlejumi ja beaivádit máhtu
• joatkit lohppii gaskan báhcán oahpuid
• molsut suorggi

Jos háliidat lassedieđuid oahpposoahpamušas, váldde roahkkadit oktavuođa oahppodoaimmahahkii dahje suorggi oahpaheaddjiide. Sáhtát maiddái oahpásmuvvat SOG:a oahpposoahpamušovdanbuktimii ja Oahpposoahpamušlive vurkemii siiddu loahpas.

https://www.sogsakk.fi/media/pdf/oppisopimus/oppisopimusesittely.pdf