Ođđajagimánus 2020 rahppojuvvon čuovgagovvačájáhus lea sirdojuvvon Sámi oahpahusguovddáža luondduealáhusaid doaibmabáikái Silbaláddui. Čájáhusa ledje mielde lágideamen oahpahusguovddáža boazodoallo-, meahcce- ja luondduofelašstudeanttat.
Čájáhusa govat ovdanbuktet Sámi oahpahusguovddáža ámmátsurggiid, árgabeaivválaš bargguid ja eallima. Boazodoallostudeanttaid barggut leat eanáš sierralágan badjedili barggut jahkeáigodagaid mielde. Meahcce- ja luondduofelašstudeanttat barget máŋggabealagit luonddus ja oahput ráhkkanahttet sin bargat ofelažžan.
Luondduofelašstudeanta Mika Lustig muitala: “Čakčat 2019 mii leat earret eará oahpahallan guolásteami gávppálaš dárbbuid geahččanguovllus, mo birget ja dádjadit luonddus ja mo idjadit tealttás. Daid lassin mii leat oahpásmuvvan báikkálaš kultuvrii ja guovllu birrasii.”
Studeanttaid mielas meahcis orrun, luondu, olgun lihkadeapmi ja bohccot leat buoremus áššit dáin surggiin. Boazodoallostudeanta Niilo Vitikka dadjá: “Buoremus ášši lea go oažžu leat meahcis guhkit go guokte beaivvi.” Čájáhusas oainnát bottožiid studeanttaid árgabeaivvis davvin, mii oidno molsašuddin, ivdnán ja miellagiddevažžan. Govat leat hearkki, muhto maiddái hearvát.
Čuovgagovvačájáhus lea okta oassi Árktalaš pedagogihkka II, sámeoahpahusa digifierpmádat -prošeavtta bohtosiin. Govvačájáhusa leat plánen ja ollašuhttán Lappi Universitehta govvadáiddabajásgeassinstudeanttat ja govat leat čohkkejuvvon Sámi oahpahusguovddáža boazodoallo-, meahcce- ja luondduofelašstudeanttaid váldán govain.
Sámi oahpahusguovddáža boazodoallo-, meahcce- ja luondduofelašstudeanttat leat Mika Lustig, Minna Haapanen, Eva Alonen, Aile-Maria Karvonen, Henry Haataja, Rebekka Madisson, Fasku-Oskal Magga, Niilo Vitikka ja Pauliina Kumpula.
Čájáhus rahppui Anára doaibmabáikkis 21.1.2020 ja Roavvenjárggas Lappi Universitehtas 27.1.2020.
Sámi oahpahusguovddáža studeanttat ledje Roavvenjárggas oahppomátkkis rahpandilálašvuođa olis. Čájáhusa ovttasbargoguoibmin lei Lappi Universitehta Kulttuurisensitiivinen opinpolku (ESF) -fidnu.